ಪಾಸ್ ಇದ್ದವರಿಗೆ ಸೌಧ, ಕಬ್ಬು ಬೆಳೆದವನಿಗೆ ಹೆದ್ದಾರಿ

ಅಕ್ಟೋಬರ್ 26ರಂದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಸೌಧದೊಳಗೆ ಸಕ್ಕರೆ ಕಾರ್ಖಾನೆ ಮಾಲೀಕರ ಜೊತೆ ಸಭೆ ನಡೆಸುತ್ತಿದ್ದರು. ಎಂ.ಬಿ. ಪಾಟೀಲ್, ಸತೀಶ್ ಜಾರಕಿಹೊಳಿ, ಎನ್. ಚಲುವರಾಯಸ್ವಾಮಿ, ಸಂತೋಷ್ ಲಾಡ್, ಲಕ್ಷ್ಮಣ ಸವದಿ ಸೇರಿದಂತೆ ಸಚಿವರ ದಂಡೇ ಅಲ್ಲಿತ್ತು. ಹೊರಗೆ, ಗೇಟಿನ ಬಳಿ, ಅದೇ ಕಬ್ಬಿನ ಬೆಲೆಯ ಪ್ರಶ್ನೆ ಹೊತ್ತು ಬಂದ ರೈತರನ್ನು ಪೊಲೀಸರು ತಡೆದು ನಿಲ್ಲಿಸಿದರು. ಕಾರಣ ಒಂದೇ, ಅವರ ಕೈಯಲ್ಲಿ ಪಾಸ್ ಇರಲಿಲ್ಲ.

ಹೊಲದಲ್ಲಿ ವರ್ಷವಿಡೀ ಬೆವರು ಸುರಿಸಿದವನಿಗೆ ತನ್ನದೇ ಬೆಳೆಯ ಬೆಲೆ ಮಾತಾಡುವ ಜಾಗಕ್ಕೆ ಕಾಲಿಡಲು ಪ್ರವೇಶ ಪತ್ರ ಬೇಕು. ಆಕ್ರೋಶ ಹುಟ್ಟದೇ ಇರುತ್ತದೆಯೇ? ಸಿಟ್ಟಿಗೆದ್ದ ರೈತ ಮುಖಂಡರು ಸೌಧದ ಮುಂಭಾಗದಲ್ಲೇ ಹಾದುಹೋಗುವ ಪುಣೆ–ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಕುಳಿತು ರಸ್ತೆ ತಡೆದರು. ಪೊಲೀಸರ ಜೊತೆ ವಾಗ್ವಾದ ನಡೆಯಿತು, ಇಪ್ಪತ್ತಕ್ಕೂ ಹೆಚ್ಚು ರೈತರನ್ನು ವಶಕ್ಕೆ ಪಡೆಯಲಾಯಿತು ಎಂದು ಟಿವಿ9 ಕನ್ನಡ ವರದಿ ಮಾಡಿದೆ. ಸೌಧದೊಳಗೆ ಸಭೆ, ಸೌಧದ ಹೊರಗೆ ಸಂಕಟ.

ಅಷ್ಟಕ್ಕೂ ರೈತರು ಕೇಳುತ್ತಿರುವುದು ಭಿಕ್ಷೆಯಲ್ಲ. ಪ್ರತಿ ಟನ್ ಕಬ್ಬಿಗೆ 5,500 ರೂಪಾಯಿ ಬೆಲೆ. ಅದರಲ್ಲಿ ರಾಜ್ಯ ಸರ್ಕಾರದಿಂದ ಹೆಚ್ಚುವರಿ ಸಾವಿರ ರೂಪಾಯಿ, ಕಾರ್ಖಾನೆಗಳಿಂದ ಇನ್ನೂ ಐನೂರು. ಕೇಂದ್ರ ಸರ್ಕಾರ 2026–27ನೇ ಸಾಲಿಗೆ ನಿಗದಿಪಡಿಸಿರುವ ನ್ಯಾಯಯುತ ಮತ್ತು ಲಾಭದಾಯಕ ಬೆಲೆ (FRP) ಕ್ವಿಂಟಾಲ್‌ಗೆ 365 ರೂಪಾಯಿ, ಅಂದರೆ ಟನ್‌ಗೆ 3,650. ಹಿಂದಿನ ವರ್ಷಕ್ಕಿಂತ ಏರಿದ್ದು ಕ್ವಿಂಟಾಲ್‌ಗೆ ಕೇವಲ ಹತ್ತು ರೂಪಾಯಿ. ಇದು ಸಾಲದು ಎನ್ನುವುದು ಬೆಳೆಗಾರರ ವಾದ. ಇತ್ತ ಕಾರ್ಖಾನೆ ಮಾಲೀಕರು, 5,500 ಕೊಡುವುದು ನಮಗೆ ಕಷ್ಟ, ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳೇ ಮಧ್ಯಪ್ರವೇಶಿಸಲಿ ಎನ್ನುತ್ತಿದ್ದಾರೆ.

ಇದು ನಿನ್ನೆ ಮೊನ್ನೆ ಶುರುವಾದ ಹೋರಾಟವೂ ಅಲ್ಲ. ವಾರದ ಹಿಂದೆ ಬೆಳಗಾವಿಯಿಂದ ‘ಧಾರವಾಡ ಚಲೋ’ ಹೊರಟಿದ್ದ ರೈತರು, ಮುಖ್ಯಮಂತ್ರಿಗಳು ಶೀಘ್ರದಲ್ಲೇ ಸಭೆ ಕರೆಯುವ ಭರವಸೆ ಕೊಟ್ಟ ಮೇಲೆಯೇ ಹೋರಾಟಕ್ಕೆ ತಾತ್ಕಾಲಿಕ ವಿರಾಮ ಕೊಟ್ಟಿದ್ದರು. ಭರವಸೆಯ ಮೇಲೆ ನಂಬಿಕೆಯಿಟ್ಟು ಬಂದವರಿಗೆ ಗೇಟಿನಲ್ಲಿ ಎದುರಾಗಿದ್ದು ‘ಪಾಸ್ ತೋರಿಸಿ’ ಎನ್ನುವ ಪ್ರಶ್ನೆ.

ಭದ್ರತೆ ಬೇಡ ಎಂದಲ್ಲ. ಮುಖ್ಯಮಂತ್ರಿ, ಸಚಿವರು ಇರುವ ಕಡೆ ಶಿಸ್ತು ಬೇಕೇ ಬೇಕು. ಹಣ ಕೊಡಬೇಕಾದವರು ಕಾರ್ಖಾನೆಯವರು, ಹೀಗಾಗಿ ಮೊದಲು ಅವರ ಜೊತೆ ಮಾತಾಡುತ್ತೇನೆ ಎನ್ನುವುದು ಮುಖ್ಯಮಂತ್ರಿಗಳ ಸಮಜಾಯಿಷಿ. ಅದಕ್ಕೆ ತಕ್ಕಂತೆ ಮಾಲೀಕರಿಗೆ ಬೆಳಗ್ಗೆ ಹನ್ನೊಂದು ಗಂಟೆಗೆ ಸಭೆ, ರೈತ ಪ್ರತಿನಿಧಿಗಳಿಗೆ ಮಧ್ಯಾಹ್ನದ ನಂತರ ಸಭೆ ಎಂದು ವೇಳಾಪಟ್ಟಿಯೂ ಸಿದ್ಧವಾಗಿತ್ತು. ತರ್ಕ ಸರಿ ಇರಬಹುದು. ಆದರೆ ಮಾಲೀಕರಿಗೆ ಮೊದಲ ಸಾಲು, ಬೆಳೆಗಾರನಿಗೆ ಕೊನೆಯ ಸಾಲು, ಅದೂ ಪಾಸ್ ಇದ್ದರೆ ಮಾತ್ರ ಎನ್ನುವ ಸಂದೇಶ ಹಳ್ಳಿ ಹಳ್ಳಿಗೆ ಹೋದರೆ ಅದು ಯಾರ ಸೋಲು?